Кукмарадан Сочига кадәр: «Спорт җире — 2026» марафоны старт алды

Кукмараның Туеш стадионында бу атнада зур спорт бәйрәменең уты кабынды — биредә «Спорт җире — 2026» Бөтенроссия марафонының муниципаль этабы старт алды. Әлеге вакыйга көч, җитезлек, сәламәтлек һәм какшамас команда рухының чын гимнына әверелде.
Күк йөзендә яңгыр болытлары хуҗа булуга карамастан, стартка командалар шактый чыкты.

Волейбол һәм мини-футбол буенча матчлар үтүче уен мәйданчыкларының тирә-юньдәге һавасы азарт һәм җиңүгә сусау белән тулы иде. Ә ГТО нормативларын тапшыру секторларында үзенчәлекле атмосфера хөкем сөрә: биредә атаклы спортчылар белән рәттән басып яшь спорт сөючеләр үзләрен сыный. 

Кайбер сынауларда Кукмара телевидениесендәге хезмәттәшләрем дә катнашты һәм алар спортка һөнәр комачауламый — теләк кенә кирәк, дигән фикерне тагын бер кат исбатладылар. Районның яшьләр эшләре һәм спорт идарәсе җитәкчесе Илсур Кашапов билгеләп үткәнчә, район өчен бу әһәмиятле вакыйга беренче тапкыр үткәрелә.

«Бу этапта җиңүчеләр үз районнарын республика дәрәҗәсендә Саба районында үтәчәк бәйгедә тәкъдим итәчәкләр, ә иң яхшылардан да яхшылары кояшлы Сочига — Бөтенроссия пьедесталын яуларга китәчәкләр, — дип ассызыклады ул. — Ә әлегә чын күңелдән катнашучыларга уңышлар һәм җиңүгә ихтыяр телибез». 

«Спорт җире» Бөтенроссия марафоны — ул ярышлар гына түгел, ә Россия Федерациясе Авыл хуҗалыгы министрлыгының масштаблы проекты. «Авыл территорияләрен комплекслы үстерү» дәүләт программасы кысаларында ул ерак төбәкләрдә яшәүчеләрне мәңгелек кыйммәтләр: сәламәт яшәү рәвеше һәм актив ял итү шатлыгы тирәсенә берләштерә.

Фото: Алсу Гатауллина/ «Кукмор-информ»