Шәйфетдиновлар Починок-Сутер авылыннан. Хуҗа ханымга карап, аны күп балалы әни димәссең дә: бер дә арган, талчыккан кыяфәтле түгел. Югыйсә, ул - өйдәге барлык эш өчен җаваплы хуҗабикә генә түгел, авыл мәктәбендә рус теле һәм әдәбияты укытучысы, сыйныф җитәкчесе, профком рәисе, җирле депутат, концертлар, Сабантуйлар алып баручы да. Артында көчле тыл булмаса, моның барысына да җитешмәс тә иде: гаилә башлыгы Владимир Шаһи улы хатыны өчен ныклы терәк булып тора. Хуҗалыкта күп нәрсә аның көче белән ясалган. Кызганыч, без килгәндә өйдә булмады – вахта алымы белән Когалымда эшли икән.
