Кукмара районында ике хуҗалык янган, 7 баш терлек һәлак булган

22 августта сәгать 02.28дә Кукмара районының 117нче янгын сүндерү-коткару частенең элемтә пунктында Мәмәшир авылының Ленин урамындагы хуҗалыкта янгын чыгу турында хәбәр алына. Бу хакта 117нче янгын сүндерү-коткару часте начальнигы Илмир Хәбибрахманов хәбәр итте.

«Хуҗалык корылмалары бер-берсенә тыгыз урнашканлыктан, ялкын телләре аларның берсеннән икенчесенә тиз арада тарала. Беренче янгын сүндерү подразделениесе хезмәткәрләре килгәндә ике хуҗалык тулысынча яна, утның яна торган корылмадан бер метр читтә төзелгән күршедәге торак йортка күчү куркынычы бар иде. Әлеге өйне янгын сүндерүчеләр саклап калды», — дип аңлатма биреде Илмир Хәбибрахманов.

Янгын нәтиҗәсендә 285 квадрат метр мәйданда ике хуҗалык кара күмергә әйләнә, 7 баш мөгезле эре терлек һәлак була. Кешеләргә зыян килми.

Корылмалар иминиятләнгән була. Янгын сүндерүгә 21 кеше һәм 12 данә техника җәлеп ителә. Фаҗиганең сәбәпләре ачыклана.

фото: районының 117нче янгын сүндерү-коткару часте