Кукмара районы үзәк дәваханәсе: хроник чирләрне контрольдә тотыгыз

Кан басымы, шикәр авыруы кебек хроник чирләр белән яшәүчеләргә нинди киңәшләр бирер идегез?

Газета укучы

Әлеге сорауга район үзәк дәваханәсеннән түбәндәге җавап алынды:

• Участок терапевтына яки профильле белгечкә (кардиолог, эндокринолог) даими күренегез. Планлы медицина тикшерүләрен һәм диспансеризацияне калдырмагыз. Даруларны табиб киңәш иткәнчә, билгеләнгән дозада һәм режимда кабул итегез. 
• Яңа өзелгән яшелчәләргә, җиләк-җимешләргә, тулы бөртекле продуктларга, майсыз ит һәм балыкка өстенлек бирегез, калий һәм магнийга бай продуктларны рационга кертегез. Тоз, шикәр, туенган һәм трансмайлар куллануны чикләгез. 
• Тиз атлап йөрү, йөзү, велосипедта йөрү кебек уртача физик күнегүләрне көнгә 30-60 минут дәвамында башкару тән авырлыгын контрольдә тотарга, матдәләр алмашын яхшыртырга һәм йөрәк-кан тамырлары системасын ныгытырга ярдәм итә. 
• Шикәр диабеты вакытында көн саен аяк табаннарында киселгән, ярылган, җәрәхәтләнгән урыннар, сөялләр һәм кызарулар бармы-юкмы икәнен тикшерегез. Уңайлы аяк киеме киегез. Кечкенә генә үзгәрешләр булганда да табибка мөрәҗәгать итегез.
• Сәламәтлек көндәлеге ачып, анда кан басымы, кандагы шикәр күләме, кабул иткән дарулар, физик активлык һәм гомуми хәлегез турында мәгълүмат язып барыгыз.

Фото: «Кукмор-информ»

«Кукмор Татарстан» МАКС каналына язылыгыз