Кукмара спортчыларын Кытай көтә һәм Альп таулары

Алдан ук әйтеп куйыйк әле: Кукмарадагы тау чаңгысы мәктәбендә тренер Ильяс Ибәтовта шөгыльләнүче Илназ Нәҗметдинов белән Хәйдәр Әхмәтшиннарга сноуборд буенча яшүсмерләрнең Россия җыелма командасының баш тренеры, спортчыларны Олимпиадага әзерләүче Евгений Пронашко шунда ук игътибар итә. 

«Евгений Владимировичны безнекеләр: Илназ белән Хәйдәр үзләренең чыдамлы булулары һәм физик яктан яхшы әзерлекләре белән җәлеп иттеләр, һәм ул алар белән бер ел дәвамында эшләп карарга теләге булуын әйтте. Чыдамлылык буенча физик күрсәткечләре төп җыелма команда егетләренекенә караганда яхшырак икәнен бәяләде. Һәм ул хәтта нәкъ менә безнекеләрне 2030 елда үтәчәк Олимпиадага әзерләү мөмкинлеге бар, диде. Шуңа күрә ул аларны яшүсмерләрнең Россия төп җыелма командасы составы белән берлектә октябрь аенда Кытайда — Олимпиада трассасында үтәчәк ике атналык җыенга чакырды», — ди сноуборд буенча Татарстан җыелма командасының баш тренеры, Кукмара тау чаңгысы базасында бик күпләрне спортка тарткан Диләрә Ибәтова.

Көндез кояш кар белән берлектә күзләрне яндыра башлаганлыктан, һәм эссе булу сәбәпле трассадагы карның катылыгы кимегәнлектән, Эльбруста шөгыльләнгәндә спортчыларга иртәнге сәгать 3.30да, таулар әле ял иткәндә үк йокыдан торырга туры килә. Башкалар әле тулысынча уянган арада инде Илназ белән Хәйдәр тиз генә җыенып, сәгать 4тә тауда булып, үзләре үтәчәк трассаны тренерлары белән әзерли башлыйлар.

«4 сәгать шөгыльләнгәннән соң, без таудан базага төшеп, иртәнге ашны ашап алгач йокладык, ял иттек. Төштән соң инде гомуми физик әзерлек башлана иде, көн саен таулар буйлап 15 чакрым юл уздык. Әлеге маршрутлар барышында экскурсияләрдә булдык, табигатьнең искиткеч матур урыннарын күрдек, атларда йөрдек, шарлавыкларга сокландык. 15 көн дәвамында әнә шулай Эльбрусны буйсындырдык без. Сүз уңаеннан, кар булмауга карамастан, җәй көнендә дә мәктәбебездә күнегүләр туктап тормады. 90нан артык бала бүгенге көндә тау чаңгысы, фристайл, сноуборд белән актив шөгыльләнә», — ди Диләрә.

Илназ белән Хәйдәргә 16 яшь. Тренерлары Ильяс Ибәтов янына килеп шөгыльләнә башлаганда сабыйлар гына булалар, һәм менә сигез ел инде алар бар күңелләре белән сноубордка гашыйк. Эльбруска барулары да очраклы гына түгел, икесе дә, зурларның беренче спорт разрядын үтәп, спорт остасына кандидат исемен алырга бер адым ераклыкта торалар. Икесе дә — сноуборд буенча республика ярышларының чемпионнары һәм призерлары. Икесе дә, сноуборд буенча республика җыелма командасы составында булып, Татарстан данын илкүләм яклыйлар. Илназ — сноуборд-кросс буенча Бөтенроссия ярышында көмеш медаль призеры. 

Кытайга барачакбыз, дигән искиткеч шәп яңалыкны ничек кабул иттеләр дип кызыксынам тренерларыннан. 

«Илназ — ул безнең бик эмоциональ егет. „Мин 2030 елда Олимпиадада катнашам һәм аңа әзерләнәчәкмен“, — диде. Ә Хәйдәр исә тыйнаграк, сабыррак, күзәтүчәнрәк. Ул исә: „Ничек килеп чыгар инде“, — дип бәяләде. Бүгенге көндә егетләр спорт залларында Кытайга барырга әзерләнәләр», — ди Диләрә. 

Эльбруска Кукмара егетләре генә түгел, берникадәр тәҗрибә туплау өчен 12 яшьлек Камилә Шәрипова да бара. Бик яшь кенә булуына карамастан, аның да нәтиҗәләре матур, ски-кросс буенча Бөтенроссия ярышларына әзерләнә.

Димәк, Кукмарадагы күппрофильле лицейның 10 сыйныф укучылары Илназ Нәҗметдинов белән Хәйдәр Әхмәтшиннар октябрь аенда ике атнага Кытайга барачаклар. Икенче елга Олимпиада дәрәҗәсенә бик якын булган укучыларның Россия спартакиадасында чыгыш ясаячаклар. Һәм... 2030 елда Франциянең Альп тауларында үтәчәк кышкы Олимпиадага да ерак калмый. 

Алга карап фикер йөртүче, тырыш, чыдам егетләребез: «Максатны күрәм — каршылыкларны — күрмим», — дигән девиз белән яшиләр. Куйган бар максатлары уңышлы булсын! 

фото: Диләрә Ибәтова