Киләсе елга Җиңү Паркын башка урынга күчерү көтелә

-Азат Харисович, 1970 елларда нигез салынган, сугыш чоры елларын мәңгеләштерү өчен төзелгән Җиңү Паркын нинди үзгәрешләр көтә?

-Шәһәр үзәгендә урнашкан әлеге парк - район халкы бик теләп йөри торган урыннарның берсе. Анда 9 май - Җиңү бәйрәмендә генә түгел, башка көннәрдә дә әби-бабайларны, балалар, яңа тормыш коручы яшь парларны, ял итүчеләрне күрергә була. Кемдер Бөек Ватан сугышында һәлак булган солдатлар истәлегенә куелган стела, яу кырында ятып калган кукмаралыларның исемнәре уелган стенд янында үзенең якыннарын искә ала, Мәңгелек утка чәчәкләр сала, ә кемдер паркта урын алган хәрби техникалар белән таныша. Яшь буынга патриотик тәрбия бирүдә дә паркның әһәмияте чиксез зур. Әмма әлеге комплекс 52 мең халкы булган районыбыз өчен бик кечкенә. Анда яңа төр техника урнаштыру, архитектура һәйкәлләрен яңарту өчен дә урыннар җитми. Шунлыктан без район башлыгы Сергей Димитриевка әлеге паркны Атлас Булатов исемендәге мәдәният һәм ял паркы белән Кукмара үзәк мәчете янындагы буш урынга күчерү фикерен җиткердек. Ниятебез җитәкчелек тарафыннан уңай бәяләнде. Бу уңайдан район халкының да фикерен белү өчен Кукмара муниципаль районы (http://kukmor.tatarstan.ru), "Хезмәт даны" газетасы (http://kukmor-rt.ru) сайтларында һәм социаль челтәрләрдә сораштырулар урнаштырыла. Бер генә мөрәҗәгать, тәкъдим дә игътибардан читтә калмаячак.

Язманы тулысынча "Хезмәт даны" газетасыннан укый аласыз