Татарстанда коронавирустан унберенче кешенең гомере өзелгән

Татарстанда Covid-19 диагнозы куелган унберенче кеше вафат булган. Бу турыда «Татар-информ» мәгълүмат агентлыгына ТР Президентының матбугат хезмәте җитәкчесе Лилия Галимова хәбәр итте.

Әлмәт шәһәрендә яшәгән 1976 елгы ир-атны 2 июньдә Республика клиник онкология диспансерының Әлмәттәге филиалы базасында оештырылган вакытлы йогышлы авырулар госпиталенә китергәннәр. Аңа ике яклы пневмония диагнозы куелган.

Пациент ИВЛ аппаратына тоташтырылган. Анда уртача авырлыктагы шикәр диабеты булган. 3 июньдә пациентның йөрәге тибүдән туктаган.

Ир-атның үлем сәбәбе — яңа төрдәге Covid-19 коронавирус инфекциясе дип билгеләнә.
 

фото: «Татар-информ»