Кукмара районында тагын ике кешедә коронавирус очрагы ачыкланган

Татарстанда узган тәүлектә коронавирусның 113 яңа очрагы ачыкланган. Бу хакта ТРда коронавирус буенча оператив штаб хәбәр итә.

Биш кеше чирне читтә йоктырып кайткан, калганнары якыннан аралашканда йоктырылган. 27 кеше дәваханәгә салынган, 86 кеше өйләрендә дәвалана.

Казанда – 65, Яр Чаллыда – 13, Алабуга районында - 6, Яшел Үзән, Лениногорск районнарында - дүртәр, Минзәлә районында - 3, Югары Ослан, Кукмара, Түбән Кама районнарында - икешәр, Аксубай, Алексеевск, Әлмәт, Зәй, Лаеш, Менделеевск, Яңа Чишмә, Норлат, Питрәч, Балык Бистәсе, Тукай, Чистай районнарында - берәр авыру очрагы ачыкланган.

Бөтен вакыт эчендә Татарстанда Covid-19ның 44 411 очрагы теркәлгән, 37 658 кеше терелгән, шул исәптән 19 - узган тәүлектә.

Фото: «Татар-информ» МА