Кукмараның яшь юл хәрәкәте инспекторлары “Имин тәгәрмәч”тә көч сынашты (+фото)

Манзарас урта мәктәбендә яшь юл хәрәкәте инспекторлары катнашында "Имин тәгәрмәч - 2014" бәйгесе үтте. Балалар катнашында килеп чыккан бәхетсезлек очракларын кисәтү максатында оештырылган әлеге чарага район мәктәпләреннән 21 команда килгән иде.

Укучылар юл йөрү кагыйдәләрен белү, беренче медицина ярдәме күрсәтү, велосипедта йөрү буенча үзләренең осталыкларын күрсәтте. Биремнәр шактый катлаулы булганлыктан, төгәллек, җитезлек сорый иде. Балаларның берсе дә югалып калмады - бәйгегә тырышып әзерләнгәннәр. Барлык балларны бергә туплаганнан соң, беренче урынга Манзарас урта мәктәбе командасы чыкты. Икенче-өченче урыннарны исә Кукмара өченче урта мәктәбе һәм Зур Сәрдек гимназиясе командалары бүлеште. "Юл йөрү кагыйдәләрен иң яхшы белүчеләр" дип - Лельвиж, "Медицина өлкәсендәге уңышлары өчен" - Ош.Юмья, "Иң яхшы велосипедта йөрүчеләр" дип Урта Комар урта мәктәбе командалары табылды.