«Демография» илкүләм проекты буенча Татарстанда тагын 19 гериатрия кабинеты ачыла

Быел «Демография» илкүләм проекты һәм «Өлкән буын» төбәк проекты буенча Татарстанда 19 яңа гериатрия кабинеты ачылачак. Бу турыда «Татар-информ» мәгълүмат агентлыгы яза.

Гериатрия кабинетын Кукмарада да ачу планлаштырыла. Кукмара районы үзәк дәваханәсенең баш табиб урынбасары Руслан Димитриев сүзләренә караганда, әлеге кабинет өчен поликлиниканың беренче катында урын билгеләнгән.

Гериатрия кабинетлары 65 яшьтән өлкәнрәкләргә ярдәм күрсәтү өчен булдырыла. Мондый ярдәмне 1400 якын өлкән яшьтәге кукмаралы алыр дип планлаштырыла.

Бер шәфкать туташы һәм табиб «гериатрия» белгечлеге буенча өстәмә укып кайттылар.

Әлеге кабинетларда табиблар «картлык астениясе» симптомы булган, начар ишеткән һәм күргән, хәтере чуала башлаган кешеләрне ачыклап, аларга медицина ярдәме тәкъдим итә.

Фото: Алсу Сәләхетдинова/ «Хезмәт даны»