Тат.Тулба башлангыч мәктәбендә мәрхәмәтлелек турында сөйләштеләр (фото)

Теткәләнә, туза бик тиз,

Мишень бит безнең йөрәк.

Тузмас иде, бер-беребезгә

Булсак мәрхәмәтлерәк.

Җирдә күпме кешеләргә

Кирәк таяныч терәк.

Мәрхәмәтебез белән без

Булыйк мәһабәтлерәк. (Ф.Яруллин)

Мәрхәмәтлелек - кешеләрдәге иң матур сыйфатларның берсе. Мәрхәмәтле кешеләр алар - киң күңелле, олы йөрәкле, һәрвакыт ярдәмчел, көнләшүне белмәүче изге кешеләр.

Халкыбызда борынгыдан ук ятимнәргә, язмыш тарафыннан кимсетелгән ке­шеләргә карата бер гадәт яшәп килгән. Аларның хәлләренә кергәннәр, кулларыннан килгәнчә ярдәм иткәннәр. Мондый кешеләргә карата мәрхәмәтле булганнар. Бүгенге авыр заманда мәрхәмәтле булу бигрәк тә кирәк. Ата-ана назын күрмәгән күпме сабый, ятим бар. Үз балалары булып та картлар йортында, үз әти-әниләре булып та балалар йортында тәрбияләнүчеләр йөрәкне әрнетә.

Кешеләр! Без дә булдыра алганча изге эшләрдә катнашыйк, ятимнәргә ярдәм итик, әти-әниләргә, туганнарга, өлкәннәргә, иптәшләребезгә мәрхәмәтле булыйк.

Авыл башлангыч мәктәбендә укучыларда мәрхәмәтлелек, шәфкатьлелек, игелеклелек сыйфатлары тәрбияләү; яхшылык һәм явызлык турында күзаллау булдыру; Каюм Насыйриның "Китаб-әт-тәрбия" китабын­нан тормыш кагыйдәләрен тыңлау, асылына төшенү; "Көзге мәрхәмәтлелек атнасы" башлануын әйтеп үтү, аның турында аңлату максатыннан башлангыч сыйныфлар белән "Бер- беребезгә мәрхәмәтле булыйк" дигән тәрбия сәгате үткәрелде.
Уяндыңмы, елмай!
Көнне башла шулай.
Елмай сәбәпсезгә,
Яхшы, әйбәт сүзгә!
Изгелекләр артыр,
Явызлыклар качыр
Һәрбер кылган эшең
Изге булсын, Кеше!

Гөлнара ХӘСӘНОВА