Юл һәлакәтендә 13әр яшьлек өч үсмер зыян күргән

М7 трассасының 900нче километрында җиңел машина автовоз белән бәрелешкән.

(Казан, 17 июль, "Татар-информ"). Теләче районында "Хендай Акцент" машинасы "Мерседес" автовозы белән бәрелешкән. Нәтиҗәдә, җиңел машина әйләнеп, юл кырыена очып төшкән, өч кеше зыян күргән. Бу хакта "Татар-информ" агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтеннән хәбәр иттеләр.

М7трассасының 900нче километрындагы юл-транспорт һәлакәте турындагы хәбәр бүген бердәм 112 номеры экстрен диспетчерлык хезмәтенә килеп ирешкән. Урынга Олы Нырсыдан 122 номерлы янгын сүндерү-коткару бүлеге хезмәткәрләре, полицейскийлар, медицина хезмәткәрләре килеп җиткән.
Юл-транспорт һәлакәтендә җиңел машинада булган 13әр яшьлек 3 үсмер бала зыян күргән, аларны хастаханәгә озатканнар.