Татарстан мөфтие Камил хәзрәт Сәмигуллин Корбан бәйрәме белән котлады

Мөхтәрәм ватандашлар, дин-мөбиндәге мөселман кардәшләр! Татарстан Республикасы мөселманнарының Диния Нәзарәте һәм шәхсән үз исемемнән барчагызны да олуг Корбан гаете белән котлыйм! Елга бер мәртәбә була торан бөек бәйрәмебез – Корбан гаете – барчабызга мөбарәк һәм хәерле булсын.

Аллаһы Тәгалә безне бик күп нигъмәтләре белән уратып алган. Аларның барысы да безнең шөкер итүебезне сорый. Корбан гыйбадәте исә - шөкер итүнең иң ачык чагылышларының берсе. Корбан чалган кеше гыйбадәт савабы алу өстенә, мескен-фәкыйрьләргә дә ярдәмен җиткереп, җәмгыятьнең бердәмлеген ныгытуга үзенең өлешен кертә.

Корбан бәйрәме ул шулай ук изге сәфәр – хаҗ кылу тәмамланган  көн дә әле. Безнең ватандашларыбыз да миллионлаган  хаҗилар белән бергә Кәгъбәтүллаһ тирәсендә очраша. Аллаһы Тәгалә хаҗга барганнарның кылган гыйбадәтләрен, зикер-догаларын кабул итсен һәм туган илебезгә исән-имин әйләнеп кайтырга язсын, Аллаһы Тәгаләнең иксез-чиксез мәрхәмәтенә барчабызга да ирешергә насыйп әйләсен! 

Олы гает көнендә бәйрәм намазын укырга, корбаннар чалырга, күңелләребездәге мәрхәмәт, шатлык-куаныч хисләрен тирә-юньдәгеләргә җиткерергә язсын! Аллаһ Раббыбыз гаиләләребезгә ныклык, өйләребезгә бәрәкәт бирсен! Ил-көннәребез тыныч, имин, бәйрәмебез мөбарәк булсын!

Ихтирам һәм изге теләкләр белән Татарстан  мөфтие  Камил хәзрәт СӘМИГУЛЛИН

Фото: dumrt.ru