Кукмарада быел муниципаль координацион советның алты утырышы узды

Районда эш шартларын яхшырту һәм хезмәтне саклау максатыннан агымдагы елның беренче яртыеллыгында муниципаль координацион советның алты утырышы булды. Аларның икесе урыннарга барып үткәрелде. Берсе Түбән Казаклар авылындагы 1000 баш сыерга исәпләнгән мега-ферма төзелешендә үткәрелеп, төзелеш мәйданчыкларының оештыру-технология документларына тәңгәл килүенә, хезмәтне саклауның торышына, эшчеләрнең шәхси саклану чаралары белән тәэмин ителүенә, эш шартларын махсус бәяләүгә аерым игътибар бирелде. Утырышның икенчесе Вахитов исемендәге хуҗалыкта булып, терлекчелек торакларында һәм язгы кыр эшләре барышында хезмәтнең сакланышын бәяләүгә юнәлтелгән иде. Иң мөһиме, алты ай эчендә районда эш урыннарында бәхетсезлек очраклары теркәлмәгән.

Моннан тыш, март аенда барлык төр милек формасындагы оешма һәм предприятиеләрнең белгечләрен - 50дән артык белгечне хезмәтне саклау мәсьәләләре буенча укыту үткәрелде.