Каенсар авылыннан Хәлиуллиннар гаиләсе конкурста җиңү яулады

Казанның "Әкият" курчак театрында китап укучы гаиләләр арасында оештырылган "Әкият иле дуслык һәм тынычлык белән яши" дигән республика конкурс-фестивалендә җиңүчеләрне тәбрикләделәр. Чарада Каенсар авылыннан Хәлиуллиннар гаиләсе дә катнашты. Аларга оештыручылардан Рәхмәт хаты һәм кыйммәтле бүләк тапшырылды. Бәйрәм тантанасыннан соң җиңүчеләр өчен концерт күрсәтелгән, Казан буенча экскурсия оештырылган. Сәяхәт "Туган авылым" ресторанында чәй эчү белән төгәлләнгән.

Конкурс шартлары буенча өч кешедән дә ким булмаган гаилә дуслык турында әкият сәхнәләштерергә тиеш булган. Бәйгенең беренче этабына районыбызның 23 китапханәсеннән иң актив гаиләләр үз эшләрен тәкъдим иткәннәр.