Фото: Кукмаралылар этнографик диктант язды

Бүген, 3 ноябрьдә, Халыклар бердәмлеге көне алдыннан, Россиянең 85 төбәге, бәйсез дәүләтләр берлеге илләре: Әзербайҗан, Әрмәнстан, Белоруссия, Казахстан, Кыргызстан, Молдовия, Таҗикстан, Төркмәнстан, Үзбәкстан, шулай ук Абхазия һәм Көньяк Осетиядә "Зур этнографик диктант" үтте. Бу проектка республикабыз, шул исәптән кукмаралылар да актив кушылды.

Кукмараның Чыңгыз Айтматов исемендәге 1нче гимназиясендә оешкан мәйданчык бу диктантта катнашырга теләк белдерүчеләрне ачык ишекләр белән каршы алды. 100гә якын кеше 45 минут эчендә 30 биремгә (сораулар федераль һәм төбәк сорауларыннан тора) җавап биреп, Россия халыкларының тормыш-көнкүреше турында белемнәрен, этнографик грамоталылыкларын күрсәтте. Алар арсында 15 яше тулган яшүсмерләр дә һәм пенсия яшендәге өлкән кешеләр дә бар иде.

-Мондый төр чарада беренче тапкыр катнашуым. Мәктәп елларына кайткандай булдым. Сорауларның төрле катлаулылыктагысы бар. Әмма яхшылап уйласаң, җавапларны табарга була. Яхшы балл туплармын дип өметләнәм, - ди Кукмарадан Лилия Бареева.

-Күпмилләтле төбәк буларак, Кукмара халкының бу проектка битараф калмавы өчен сөенеп, оештыручылар исеменнән рәхмәтемне белдерәм, - ди мәйданчык кураторы Азат Кәшипов.

Диктант нәтиҗәләре 12 декабрьдә www.miretno.ru сайтында билгеле булачак.

Алсу СӘЛӘХЕТДИНОВА хәбәре, Эльвира МӨБАРӘКШИНА фотолары