Ринат Шәмиев Үрәсбаш авылында юлларны кардан чистарту мәсьәләсенә ачыклык кертте

Үрәсбаш авылында урамнарны чистарту кайчан тәртипкә китерелер икән? Кыш башланганнан бирле тилмерәбез бит. Буран булган саен машиналар батып кала. Бу арада бөтенләй дә юллар чистартылмый. Халык эшкә киткәнче көрәтәсе бит инде аны. Башка авылларда юллар үзвакытында тәртипкә китерелә, ә бездә көн тудымы, бүген ничек урамнан чыгасы булыр икән дигән проблема.

Авыл халкы исеменнән Владислав ГАВРИЛОВ. Фотолар да теркибез. Җавап көтеп калабыз.

Сорауга Түбән Үрәс авыл җирлеге башлыгы Ринат Шәмиев болай дип җавап бирде:

- Безнең Түбән Үрәс җирлегенә биш авыл керә. Җирлекнең тракторы булмау сәбәпле, юлларны чистартырга договорны “Кукморагрохимсервис” җәмгыяте белән төзедек. Җирлектәге бер авылда да юлның өзелгәне юк. Бары тик 9 февраль көнне, көне буе буран булу сәбәпле, юллар чистартылмады. 10 февраль көнне трактор иртәнге сәгать алтыдан чыгып китте. Үрәсбаш – җирлектәге иң ерак авыл. Шуңа күрә юл соңрак ачыла. Моны халык аңласын иде. Узган кышта “Кукморагрохимсервис” тракторы кар чистартуда 17 көн эшләгән булса, соңгы өч айда 30дан артып китте.