Кукмара районыннан биш кеше Казанда чыккан янгында һәлак булган

Кичә Казанда булган янгыннан соң биш кешенең мәете табыла. Бу турыда Россия Гадәттән тыш хәлләр министрлыгының Татарстан Республикасы буенча баш Идарәсе пресса хезмәтендә хәбәр иттеләр, дип җиткерә «Татар-информ» мәгълүмат агентлыгы.

Янгын Казанның Киров районында Адмиралтейская бистәсе буенча 13нче йорт каршындагы ике катлы бинада килеп чыга. Хәбәр 112 Бердәм хезмәтләр номерына сәгать 3.55тә килеп ирешә. Янгынны сүндергән вакытта биш ир-атның мәете табыла.

«Хезмәт даны» газетасына шәхси чыганактан билгеле булганча, һәлак булучыларның барысы да Кукмара районы кешеләре. Якынча фаразлар буенча янгын сәбәбе - төзек хәлдә булмаган электр чыбыклары. Тикшерүчеләр фаҗига сәбәпләрен ачыклый.

фото: Россия Гадәттән тыш хәлләр министрлыгының Татарстан Республикасы