Зур Сәрдектә "Ямьле җәй" бәйрәме узды

26 июль көнне Зур Сәрдек авыл мәдәният йорты ишегалдында "Ямьле җәй" дип аталган балалар бәйрәме үткәрелде. Бәйрәм китапханә һәм мәдәният йорты хезмәткәрләре белән берлектә оештырылган иде. Биредә кече һәм урта яшьтәге 100 ләп бала катнашты. Алар экологик табышмаклар, туган ягыбыз турында сораулар, табигать турында башваткычлар чиштеләр. Балалар җәй турында матур итеп шигырьләр укыдылар, хикәяләр төзеп сөйләделәр. Иң тапкыр балаларга жетоннар өләштеләр. Бәйрәмнең икенче өлешендә балалар белән саф һавада хәрәкәтле уеннар оештырылды. Балаларның һәркайсы бүләкләр алды. Ахырдан иң күп китап укучы Хөсәенова Дилә (3 класс), конкурсларда актив катнашкан китап укучылар Шәймәрданов Сәйдәш (5 класс), Шагабиева Йолдыз (7 класс), Ганиева Галия (6 класс) китапханәнең махсус бүләкләренә ия булдылар. Бәйрәмнең йомгаклау өлешендә балалар җәй боткасы һәм үлән чәе белән сыйландылар.

фото: http://images.yandex.ru/yandsearch