Кукмарага сәяхәт

Мәктәпләрдә каникул көннәре үтеп китте. Каникулның һәр көнен файдалы уздыру максатыннан укучылар белән Кукмарага сәяхәт кылырга уйладык. Тирән тарихлы Кукмарабыз бүген нинди икән? Сәяхәт барышында балалар, әлбәттә, бу сорауга җавап таптылар. Иң элек Кукмараны башлангыч сыйныф укучылары белән иңләп кайтырга уйладык. Күп кенә истәлекле урыннарда, соңгы вакытта сафка баскан ял һәм мәдәният паркында булдык. Ә иң мөһиме һәм кызыклысы, әлбәттә, Туган төбәкне өйрәнү музеенда Кукмараның еракларга таралган данлы тарихы, кызыклы экспонатлар белән танышу булды. Экскурсоводларның мавыктыргыч итеп сөйләүләре укучылар күңеленә тирән үтеп керде, шул ук вакытта алар кызыксындырган сорауларын да бирергә өлгерделәр. Хис-кичерешләр белән уртаклаша-уртаклаша юлыбызны үзәк китапханәгә таба дәвам иттек. Китапханәгә кергәч, балаларның йөзендә тагын бер кат шатлык, соклану чаткылары кабынды. Китапханә буйлап "сәяхәт" иткәннән соң, кино залына кереп мультфильм карау күңелләренә тагын да ямь өстәде. "Укучыларның мәдәни көндәлекләре"нә китапханә һәм музей хезмәткәрләре тамгалар куйдылар һәм хәерле юллар теләп озатып калдылар.

Ә 5-6 сыйныф укучылары белән исә, күп кенә үзгәрешләр кичергән Кукмарабызны күзәтә-күзәтә, тегү фабрикасына юл алдык. Укучыларны биредә бик җылы каршыладылар. Фабрикада эш гөрли. Балалар кызыксынып эш барышын күзәтте. Төрле станоклар, тегү машиналарын карап, эш процессын, тегүчеләр теккән матур курткаларны күрү һәркемдә зур кызыксыну һәм соклану уятты. Укучыларны бигрәк тә компьютерлаштырылган эш машиналары җәлеп итте.

Экскурсия барышында балалар һәр хезмәтнең зур җаваплылык һәм тирән белем таләп итүен ачык аңладылар. Шундый тәрбияви экскурсиядән соң ял итәргә дә була - сәяхәтне "Боз сарае"на таба юнәлттек. Рәхәтләнеп бозда шуып, күңелләренә никадәр шатлык, тәннәренә сихәт, рухи байлык тупладылар укучылар бу көнне. Туган ягыбыз, районыбыз өчен горурланып кайттылар алар. Каникул көннәре менә шундый кызыклы хатирәләре белән күңелләргә кереп калыр әле.

Альбина МӨХӘММӘТҖАНОВА, Мәчкәрә урта мәктәбе