Зур Кукмарадагы 1674 нче сайлау участогына сайлаучылар ат белән килде

Зур Кукмарадагы 1674 нче сайлау участогында төш турысында аеруча зур җанлылык булып алды. Чөнки ике сайлаучы, Зур Кукмара авыл җирлеге башлыгы Ришат Хәнәфиевның әнисе, 62 яшьлек Гөлфия ханым һәм «Баламышкин» гармунчылар ансамбле җитәкчесе 63 яшьлек Илгиз Зариповлар атка утырып сайлау участогына килделәр. 

«Машинага утырып кем дә килә ала ул, без менә атка атланып килергә уйладык әле», — дип аңлатты бу гамәлен Илгиз Зарипов.

Әлеге сайлау участогына барлыгы 1100 сайлаучы теркәлгән. Сәгать көндезге унберләргә шуларның 200ләбе килгән иде инде. Халык көн матур, бәрәңге алыр чак дип тормый, сайлауда катнашып гражданлык позициясен билгели. 

Әлеге участокка иң беренче булып Байлангарда туып-үскән, бүгенге көндә Зур Кукмараның Спорт урамында яшәүче Раушат Сәләхов килгән. Аңа истәлек бүләге дә тапшырылган. 

«Быелгы сайлау „гаилә белән сайла“ девизы белән үтә. Чыннан да участогыбызга гаиләләре белән килүчеләр күп. Бу юлы 10 яшь сайлаучыбыз килер дип көтелә. Аларга да истәлек бүләге әзерләп куйдык», — ди сайлау участогы рәисе Рузия Хәнәфина.

фото: Лилия Нургалиева/ «Кукмор-информ»