Тату гаилә – илебез ныклыгы: Район мәдәният йортында Гаилә елына нәтиҗә ясадылар

2024 елны Россия Президенты Владимир Путин  «Гаилә елы» дип игълан иткән иде. Әлеге карар гаиләне яклау һәм традицион кыйммәтләрне саклау өлкәсендә дәүләт сәясәтен популярлаштыру өчен кабул ителде. Бер ел эчендә гаиләләр үстерү, ярдәм күрсәтү максатыннан күп кенә эшләр эшләнде, законнар гамәлгә ашырылды, күңелле чаралар, конкурслар үткәрелде. Ел дәвамында үткәрелгән эшләрнең нәтиҗәсе буларак, Кукмара районы халкы кабат Район мәдәният йортына Гаилә елы тәмамлануга багышланган тантаналы чарага җыелды. Монда районыбызның олы хөрмәткә лаек, эштә дә, өйдә дә үрнәк булган бәхетле гаиләләре чакырылган иде. 

Кукмара халкы күпмилләтле, тату, бердәм. Моның шулай икәненә үткәрелгән һәр бәйрәмгә төрле милли киемнәрдән килгән якты йөзле, тәмле телле райондашларыбыз мисал булып тора. Бүген дә уңган-булган кукмаралылар кул эшләреннән күргәзмәләр оештырдылар, мастер-класслар үткәрделәр.

-Узып баручы  ел гаиләләрнең ныгуына, милли гореф-гадәтләрнең тагын да үсүенә сәбәпче булды. Республикакүләм, шулай ук районда да күп кенә чаралар уздырылды. Гаилә - һәркем өчен дә иң якын, иң  җылы урын. Гаиләнең һәрбер кешесе кулга-кул тотынышып атлаганда гына, гаилә нык һәм тату була. Шунысы сөенечле, районыбызда күпбалалы гаиләләр күп. Демографик күрсәткечләр буенча да Кукмара районы Татарстанда алтынчы урынны алып тора. 45 район арасында  алтынчы баскычта тору, начар күрсәткеч түгел, әлбәттә. Шулай да бу тукталып калырга сәбәп түгел. Безнең киләчәгебез – балалар кулында, – диде Кукмара районы башлыгы Сергей Димитриев залда утыручы райондашларыбызны сәламләп. 

Районыбызда быел, күпбалалы гаиләләргә ярдәм йөзеннән, акчалата сертификатлар тапшыру оештырылган иде. Бүгенге тантанада да елның икенче яртысында дүртенче балалары туган  гаиләләргә - 50, биш һәм аннан соңгы балалары туган гаиләләргә 100 мең сумлык сертификатлар тапшырылды. 

Гаилә елы уңаеннан, Гаилә учагы капсуласы Татарстанның һәр районы аша узды. Кукмарага ул Теләчедән кайтты: аны 50 ел бергә гомер кичерүче парлар Гөлфирә һәм Фәһим Әминевларга тапшырганнар иде. Ә бүген алтын юбилярлар яңа гына олы тормышка аяк баскан Альмира һәм Газизҗан Сабировларга Гаилә агачын бүләк иттеләр. Бәхетле һәм нык гаиләне символлаштырган бу агач, традицияне дәвам итеп, ел дәвамында гаилә коручы яшь парларга биреләчәк. 

Узып баручы елыбыз да ахырына якынлашты. Күпләр өчен бу ел парлы, тату булып яшәүнең бәхеткә илтүче нинди матур күренеш булуын аңларга ярдәм иткәндер. Киләсе елда да ялгызларга яр табарга, парлыларга, сау-сәләмәт сабыйлар тудырып, тигезлек белән яшәргә язсын иде!

Акчалата сертификат белән бүләкләнүче гаиләләр исемлеге: 

Нәфисә һәм Мөхәммәтхәсән Туктаровлар гаиләсе, 9 бала

Гөлшат һәм Раушан Саттаровлар, 5 бала

Альфира һәм Александр Щербаковлар, 5 бала

Динара һәм Илфат Фәттаховлар, 4 бала

Гөлия һәм Айдар Дәүләтшиннар, 4 бала

Райхона һәм Марсель Гатиннар, 4 бала

Гөлчәчәк һәм Айдар Исхаковлар, 4 бала.

Ләйсән һәм Фәнис Нуриевлар, 4 бала