Синоптик: Татарстанда декабрь ахырына кадәр тотрыклы һава торышы булмаячак

«Метео» фаразлау үзәге җитәкчесе Александр Шувалов хәбәр иткәнчә, Татарстанда декабрь ахырына кадәр тотрыклы кышкы һава торышы урнашмаячак. Бу хакта «Татар-информ» МА яза.

Аның сүзләренчә, атна башы салкын булачак, термометрның терекөмеш баганалары −8..-12 градуска, ә республиканың көнчыгышында тагын да түбәнрәк төшәчәк. Ләкин инде чәршәмбедән хәл кискен үзгәрә башлый.

«Антициклон киткәч, җылы һава торышы акрынлап кире кайтачак. Пәнҗешәмбе температура 0 градус тәшкил итә, ә җомга термометр баганасы „плюс“ тамгасын күрсәтә, һәм җепшек кар ява», — дип аңлатты Шувалов.

Ул чәршәмбе көнне кар, җилнең тизлеге секундына 12-15 метрга кадәр көчәюе көтелә дип өстәде. 13-14 декабрьдә тагын суытачак.

«Бу тотрыксызлык ай ахырына кадәр төгәл дәвам итәр кебек. Алга таба ничек булачагын әйтүе кыен», — дип нәтиҗә ясады синоптик.

Фото: «Кукмор-информ»