Кукмара кешесен алимент түләмәгән өчен хөкем итәчәкләр

Кукмара районы прокуратурасы 36 яшьлек ир-атка карата җинаять эше буенча гаепләү актын раслады. Ул балигъ булмаган баласын карау өчен акча түләмәүдә гаепләнә.

Эш материаллары буенча, 2014 елның февраленнән суд боерыгы нигезендә ир-ат балигъ булмаган кызын карау өчен ай саен акча түләргә тиеш була. Шуңа да карамастан, административ җәзага тартылган гаепләнүче балага матди ярдәм күрсәтми. Алимент буенча гомуми бурыч 1,4 миллион сумнан артыкны тәшкил итә. 

Ир-ат гаебен тулысынча таныды.

Җинаять эше карау өчен Кукмара район судына җибәрелде.