Авылда тор, шәһәрчә яшә

Авылларны үстерү, аларны саклап калу өчен хәзер аеруча күп эшләнә. Республикакүләм төрле социаль программаларның тормышка ашырылуы да моңа ачык мисал. Җирлекләрдә язгы-көзге пычракларда резина итек киеп саз ерып йөрүләр, көянтә-чиләк белән чишмәдән су ташулар да акрынлап артта калып бара. Өлкән буын әйтмешли, шәһәрчә яшибез. Күбебезнең өйләргә су кергән, урам юлларына вак таш түшәлгән, я булмаса асфальт җәелгән. Кайбер җирлекләрдә хәтта балалар һәм спорт мәйданчыклары, ял паркларына кадәр бар.

Җиде авылны берләштерүче Ош.Юмья авыл җирлегендә быел төзекләндерү эшләре җәйдән үк башланган.

-Иң зур һәм үзәккә үткән проблемаларның берсе - юлсызлык, - ди җирлек башлыгы Анатолий Рамазанов. - Федераль максатчан программа кысаларында узган ел Филипповка авылының керү һәм урам юлларына - барлыгы ике чакрым арага вак таш җәйгән идек. Быел исә әлеге эшне дәвам итеп, Вильмон халкын да яхшы юл белән сөендерә алдык. Ош.Юмья авылының Мәктәп урамы аша да хәзер асфальт юл уза. 30 миллион сумга төшкән асфальт түшәү эшләре шулай ук федераль программа буенча башкарылды.

Үзара салым акчаларының да социаль-мөһим мәсьәләләрне хәл итүдә өлеше зур. Ош.Юмья җирлегендә быел халыктан җыелган акчалар, республика бюджетыннан дүрт тапкырга артып кайтканнан соң, 1,5 миллион сумны тәшкил иткән.

-Быел һәр кешедән 300әр сум җыйган идек, киләсе елга 100әр сумга арттырырга уйлыйбыз, - дип сүзен дәвам итә җирлек башлыгы. - Иске Юмьяда - 700, Югары Юмьяда - 150, Яңа Комар һәм Ош.Юмьяда 200әр метр арада юлга вак таш җәелде. Юл төзекләндерү өчен комны җирле карьердан алган булсак, вак таш Вятка Аланыннан кайтарылды. Ош.Юмьяда сафка баскан ял паркы да авыл күрке булып тора. Яу кырында ятып калганнар истәлегенә куелган һәйкәлгә керү юлы төзекләндерелде, брусчатка җәелде. Шулай ук балалар мәйданчыгы ясап, анда эскәмияләр, турник, атынгычлар урнаштырдык, комлык куйдык. Әлеге эшләр өчен 233 мең 848 сум акча тотылды. Ял паркы территориясен койма белән әйләндереп алуда авыл халкының өлеше зур булды. Шулай ук бердәм рәвештә быел көз көне паркка йөзләп туя, чыршы, миләш үсентеләре утыртылды. Әлеге эшләрне башлап йөрүдә активлык күрсәткән Владимир Иванов һәм Николай Герасимовларга рәхмәтлемен.

Әлеге җирлеккә керүче Сәрдәүч авылындагы чишмә будкасы да үзара салым акчасы хисабына төзелгән. Киләчәктә авылларда янгын гидрантлары куярга, юлларны рәтләүне, паркны төзекләндерү эшен дәвам итәргә планлаштыралар. Вильмон, Филипповка, Сәрдәүч авылларында да су һәм газ проблемаларын хәл итәселәре бар.

-Үзара салым акчалары җыю буенча районыбыз беренче урында бара икән. Татарстанның муниципаль берәмлекләр Советы рәисе Минсәгыйрь Шакиров бу хакта телевидение аша барган бер тапшыруда билгеләп үтте. Сөендек, әлбәттә. Әлеге акчаларга башкарылган эшләр үзебезнең җирлектә дә күзгә күренә бит, - ди Ош.Юмьяда яшәүче Мария Рамазанова. - Төп урамга асфальт, ә авыл эчендәге кечкенә урамга таш салынды. Ял паркыннан да җәй буе халык өзелмәде. Балалар мәйданчыгы исә балаларның яраткан урынына әйләнде. Якташларыбыз да авылдагы яңалыклар белән һәрдаим танышып торалар. Норвегиядә яшәүче авылдашыбыз Маргарита Смирнова үзе дә төзекләндерү эшләре өчен ун мең сум акча җибәрде. Без һәр башкарылган эшне фоторәсемгә төшерәбез һәм аңа юллыйбыз. Авылның яңаруына ул да чиксез куана.

Редакциядән: үзара салым акчалары хисабына башкарылган эшләрне барлауны дәвам итәбез. Бу хакта авыл җирлекләреннән хәбәрләр, фоторәсемнәр көтеп калабыз.