Пакетны каян аласы (сорау-җавап)

Мин кирпеч заводында эшләп, 60 яшь тулып, пенсиягә чыктым. Өлкәннәр көне җитеп, пенсионерларга бүләкләр бирделәр. Миңа нишләп бирелмәде дигән сорауга Тимур Илшатович "икенче елга" дип җавап бирде. Ә икенче елга кем бар, кем юк. Соң булса да, пакет алып булмыймы? Пакетны каян аласы? Тикшереп, безгә җавап бирегез әле.

Сездән җавап көтеп, пенсионер Маннур ГАЛИУЛЛИН.

Әлеге сорауга "СервисПром" җәмгыяте директоры Биктимер ГАЛИМОВТАН түбәндәге җавап алынды.

-Маннур Галиуллин 2015 елның беренче апрелендә "Промсервис" оешмасына слесарь булып эшкә урнашкан. 2015 елның 24 июнендә үз теләге белән эштән киткән. Бүгенге көндә әлеге оешма таркалды. Өлкәннәр көне уңаеннан бүләк алу өчен районның социаль хезмәт күрсәтү үзәгенә мөрәҗәгать итәргә киңәш итәбез.