Кукмарада район Советының егерменче сессиясе булды

Эшкә керешү алдыннан вакытсыз вафат булган район Советы депутаты Шамил Әхмәтшинны искә алдылар. Көн тәртибендәге беренче чираттагы мәсьәләләр - 2017 елның 2 кварталы өчен каралган район бюджетының үтәлеше барышы, "Кукмара муниципаль районының 2017 елга һәм планлы 2018 һәм 2019 елларга бюджеты турында"гы 16.12.2016 елгы 70 санлы карарына үзгәрешләр кертү проекты турында Финанс-бюджет палатасы рәисе Илнур Сәмигуллинның чыгышлары тыңланды. Балалар-үсмерләр, яшьләр белән хәрби-патриотик эшнең торышы һәм үсеш перспективасы турында район Башкарма комитеты җитәкчесе урынбасары Рузалия Галиева сөйләде. Район Советының 28.01.2013 елгы 2 санлы карары белән расланган муниципаль хезмәт турындагы Кагыйдәнамәгә үзгәрешләр кертү проекты турында район башлыгы урынбасары Равия Каримуллина чыгыш ясады. Башка мәсьәләләр буенча Башкарма комитетның баш белгече-юристы Рамил Исрафилов, милек һәм җир мөнәсәбәтләре Палатасы рәисе Ильяс Закировлар сүз алды.

Сессиядә шулай ук 1969-1980 елларда район Башкарма комитеты рәисе урынбасары булып эшләгән Николай Егорович Белянинга "Кукмара муниципаль районының мактаулы гражданины" исеме бирү турында карар кабул ителде.