Кукмарада янгын сүндерүчеләрне пенсиягә су сибеп озаттылар

Кукмараның янгын-коткару частендә тантаналы төстә янгын сүндерүчеләр - Мансур Әхмәтшин һәм Ренат Хәсәновны лаеклы ялга озаттылар. Бу турыда районның 117нче янгын-коткару частендә хәбәр иттеләр.

«Мансур Габделшәкүр улы Гадәттән тыш хәлләр министрлыгында - 42, ә Ренат Галимхан улы 21 ел эшләде. Янгын белән көрәшүчеләр өчен махсус йола башкарылды - аларны су белән коендырдылар», - дип сөйләделәр янгын-коткару частендә. 

Тантана янгын часте бинасы каршында узды. Шәхси составка эштән азат итү турында приказ укылды. Соңыннан лаеклы ялга китүче хезмәткәрләргә теләкләр теләнде, истәлек бүләкләре тапшырылды.