Кукмарага “Татарстан – яңа гасыр” хәрәкәте килде

"Татарстан - яңа гасыр" республика иҗтимагый хәрәкәте вәкилләре "Дуслык һәм тынычлыкта яшәргә һәм иҗат итәргә" проекты кысаларында Кукмараның "Кояшкай" социаль приютында булып китте. Әлеге хәрәкәтнең башкарма комитеты рәсие Алсу Тарханова әйтүенчә, Кукмара алар өчен инде 11 сәфәр. Проект кысаларында Татарстанның барлык приютларында булырга исәплиләр. Алар Татарстанда - 21. Очрашу табигать, экология темасына карата әзерләнгән видеоязма, фотолар, Кукмара балалар сәнгать мәктәбеннән "Импульс" вокал-хореография төркеме чыгышы, китапханәчеләр әзерләгән уеннар белән үрелеп барды. Балалар өчен чараның иң күңелле мизгеле - буяу белән төсле рәсемнәр ясау һәм шулар белән фотоларга төшү булды.