Чишмәбашта дини лагерь эшләде (+фото)

Чишмәбаш авылында җәйге чорда балалар өчен дини лагерь эшләде. Анда 50дән артык бала йөрде. Авыл мулласы Шамил Шәфигуллин, абыстайлар Гөлчирә Ногманова, Фәнзилә Хәсәновалар ун көн буена балалар белән булдылар. Малайлар-кызлар бик теләп дин гыйлеменә, намаз укырга өйрәнделәр, вәгазь тыңладылар. Буш вакытларында исә бердәм булып футбол уйнадылар, ял иттеләр. Лагерьның соңгы көне аеруча истә калырлык булып үтте, бәйрәм оештырылды. Тәм-томнар, күчтәнәчләр алып, әти-әниләр, әби-бабайлар да килгән иде. Мул итеп табын әзерләнде, Фәнзия Батырова пешергән пылауны да һәркем яратып ашады. Балалар да, өлкәннәр дә күтәренке кәеф белән таралыштылар.

Сания БИЛАЛОВА, Чишмәбаш авылы