Хезмәт даны
  • Рус Тат
  • Кукмараның никахлашу сараенда 100нче пар язылышты

    Никахларының мондый түгәрәк датага туры килүе яшьләр хәтерендә озак сакланыр.

    Шимбә көнне Кукмараның никахлашу сараенда Алия һәм Руслан Хисмәтуллиннарның никахлары теркәлде. Кәләш Купкада туган, кияү – Зур Сәрдек авылыннан. Яшьләр өчен бу дулкынландыргыч вакыйга икеләтә истәлекле: алар – быел Кукмара районында никахларын теркәгән 100нче пар.

    Хисмәтуллиннар, никах теркәү кенәгәсенә үз имзаларын куеп, балдаклар алыштылар.

    Район Башкарма комитеты җитәкчесенең социаль мәсьәләләр буенча урынбасары Айгөл Әхмәтшина яшь парга мөрәҗәгать итеп, чын күңелдән гаилә корулары белән тәбрикләде, аларга Кукмара районы башлыгының Рәхмәт хаты һәм истәлек бүләге тапшырды.

    Яшьләр җиде ел элек танышып, аралаша башлыйлар. Вакытлар узу белән дуслык мәхәббәткә әверелеп, гаилә корырга теләкләрен белдерәләр. Алар бер мәктәптә, әмма төрле сыйныфларда белем алалар. Алия сүзләренә караганда, Русланның сыйныфташларын яхшы белсә дә, аның үзе белән аралашканы булмаган.

    «Волейбол буенча мәктәп ярышларында ул яныма килде дә исәнләште. Безнең аралашу шулай башланды. Ул мине хезмәт сөючәнлеге, төгәллеге, тәрбиялелеге белән җәлеп итте. Үз мөнәсәбәтләрен теркәгән 100нче пар булуыбызга шатбыз», - диде Алия. Әлегә ир белән хатын Казанда яши һәм эшли, әмма кече Ватанга кайтып, дус-тату гомер итәргә, бер-берләрен сакларга, балалар тәрбияләргә планлаштыралар.
     

    «Кукмор Татарстан» Telegram-каналга язылыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: