Кукмара районында “Шевроле Нива” машинасы җәяүлене бәрдергән

Кукмара районында юл һәлакәте булган. 17 гыйнвар көнне 15.45 сәгатьтә “Кукмара-Шәмәрдән” юлының 19нчы чакрымында “Шевроле Нива” машинасы 17 яшьлек ир-егетне бәрдергән.

Район ЮХИДИ хезмәтеннән алынган мәгълүматларга караганда, 53 яшьлек ир-ат “Шевроле Нива” машинасында Шәмәрдәннән Кукмарага таба хәрәкәт иткән. Шул вакытта 17 яшьлек ир-егет тиеш булмаган урыннан юлга йөгереп чыккан һәм аны машина бәрдергән.

Нәтиҗәдә җәяүле төрле җәрәхәтләр алган, район үзәк дәваханәсендә беренче медицина ярдәме күрсәтелгәннән соң, өенә кайтарып җибәрелгән.

фото: Район ЮХИДИ хезмәтеннән алынган