Кукмара районында исерек шофер дәүләт автоинспекторлары таләбе буенча туктамаган һәм узыш оештырган

Кукмара районында исерткеч эчемлекләр кулланган автомобиль шоферы, дәүләт автоинспекторларыннан качырга теләп, узыш оештырган. Бу хакта район Дәүләт автоинспекциясендә хәбәр иттеләр. 

Әлеге хәл 12 ноябрьдә сәгать 22.54тә Кукмараны әйләнеп узу юлында була. ВАЗ-21053 автомобиле шоферы, машинаны туктатырга теләгән дәүләт автоинспекторларының таләбен үтәүдән баш тарта, качырга җыена. 

«Тәртип бозган йөртүчене сәгать 23.24тә Түбән Казаклар авылының басу юлында тоткарладылар. Руль артында аермачык исерткеч эчемлек куллану билгеләре булган 26 яшьлек ир кеше иде. Ул элегрәк транспорт чарасы белән идарә итү хокукыннан мәхрүм ителгән була», — дип аңлатма бирделәр район Дәүләт автоинспекциясендә. 

Медицина тикшерүе нәтиҗәсендә әлеге ир кешенең организмында 0,986 миллиграмм/литр спирт ачыклана. 

Хокук бозучыга карата административ материаллар төзелә, автомобиле махсус тукталышка куела.