Россиядә вакцинация турындагы сертификатның яңа формасы гамәлгә керде

 Бүгенге көннән Россиядә коронавирустан вакцинация һәм кешенең әлеге чирне кичерүен раслаган сертификат формасындагы үзгәрешләр үз көченә керде, дип яза «Татар-информ» МА.

Сәламәтлек саклау министрлыгының шул хактагы боерыгы хокукый мәгълүмат порталында октябрь ахырында чыккан иде.

Яңа документта прививка ясаткан кеше турында мәгълүматлар (исем-фамилиясе, әтисенең исеме, туган көне, җенесе, адресы һәм белешмә тутырылган дата) урын алган.

Шулай ук QR-код, прививка датасы, вакцинаның атамасы һ.б. өчен дә урын бар. Сертификатка ревакцинация, медицина каршылыкларының булу-булмавы һәм кешенең әлеге авыруны кичерүе турында мәгълүмат та кертеләчәк.

Боерыкта әйтелгәнчә, документ вакцинация узгач өч көннән дә соңга калмыйча электрон рәвештә формалаштырыла. Бүгенге датага кадәр рәсмиләштерелгән барлык сертификатлар да Дәүләт хезмәтләре порталында яңадан рәсмиләштереләчәк.