Кукмарада туризмны үстерү мәсьәләләре буенча фикер алыштылар

«Галактика» балалар иҗат үзәгендә Кукмара районында туризмны үстерүгә багышланган киңәшмә узды. 
Район башлыгы Сергей Димитриев: «Мөмкинлекләр гаять зур, әмма без аларның барысын да кулланмыйбыз», — диде. Бу юнәлештә нинди эшләр алып барыла соң?

Туган якны өйрәнү музее директоры Рамилә Хәсәнова сүзләренчә, районда 4 туристик маршрут оештырылган. Узган ел 5 ай эчендә безнең районга 8440 турист килгән булса, быел бу сан 9461не тәшкил итә. «Туристларга тулысынча уңайлыклар тудыру өчен автомобильләр тукталышы, гомуми файдалану урыннары, кафе кебек мәсьәләләрне хәл итү мөһим», — диде ул.

Шәһәр башкарма комитеты җитәкчесе урынбасары Ринат Хәйруллин Чуашстан Республикасындагы хезмәттәшләренең эш тәҗрибәсе белән уртаклашты.

Рәссамнар берлеге әгъзасы Артур Давыдов туристларны җәлеп итү буенча үз идеясен тәкъдим итте, тиздән әлеге эшләр турында рәсми рәвештә билгеле булачак.

«XX гасыр башында мари биләмәсе» музей-этнография комплексы җитәкчесе Ольга Санникова үзләренең туристик маршруты турында сөйләде һәм район мәктәпләрен музей белән танышырга чакырды.

Фото: Эльвира Миннәхмәтова/ «Хезмәт даны»