Кукмарада милли-мәдәни автономияләрнең җирле бүлекчә җитәкчеләре катнашында киңәшмә узды

Кукмарада район башлыгы Сергей Димитриев җитәкчелегендә милли-мәдәни автономияләрнең җирле бүлекчә җитәкчеләре катнашында киңәшмә узды.

Очрашу барышында телне, традицияләрне, халыклар мәдәниятен һәм милләтара дуслыкны саклау, районда туристлык маршрутын үстерү буенча алып барылучы эшләр турында фикер алыштылар.

«Күпмилләтле районыбызда татар, рус, удмурт, мари һәм башка милләт халыклары тынычлыкта, үзара дус-тату яши. Халкыбызның телен, мәдәниятен һәм гореф-гадәтләрен саклап калу мөһим. Шуның өчен дә без барлык милли һәм дини чараларны бергәләп үткәрергә тырышабыз. Әмма без бу юнәлештә тагын да үсәргә, һәр торак пунктта милли мәдәни үзәкләр булдырылырга тиеш», — дип билгеләп үтте Сергей Димитриев.

Район башлыгы Синәр авылын мисалга китерде. Анда «Санниковлар паркы» төзелде, «XX гасыр башында мари биләмәсе» музей-этнография комплексы ачылды.

Киңәшмә ахырында милли-мәдәни автономия бүлекчәләре җитәкчеләренең хисаплары тыңланды. Алар җирлекләрдә башкарылган эшләр белән таныштырды.

Фото: Эльвира Иванова/ «Хезмәт даны»