Кукмарада “Бердәм Россия” көне кысаларында тантаналы төстә паспортлар тапшырылды

Район Мәдәният йортында тантаналы чара узды – республикакүләм “Гражданлык сәгате” акциясе кысаларында 14 яшь гражданга паспортлар тапшырылды.

Укучылар төп документны “Бердәм Россия” Бөтенроссия сәяси партиясе Татарстан төбәк бүлеге сәркатибе урынбасары Римма Ратникова һәм район башлыгы Сергей Димитриев кулыннан алды.

- Паспорт алу ул – олы тормышка аяк басу дигән сүз. Мин сезне чын күңелемнән әлеге көн белән котлыйм. Акыллы, тәүфыйклы булыгыз, тырышып укыгыз, - дип үзенең теләкләрен ирештерде Римма Ратникова.

Паспорт тапшыру тантанасына балаларның әти-әниләре дә килгән иде.

- Бүген икенче улым Рөстәм паспорт ала. Ул Кукмара өченче мәктәбендә укый. Әлеге көн безнең хәтердә зур бер вакыйга булып кереп калачак. Балаларыбыз тәртипле булсыннар, безнең йөзгә кызыллык китермәсеннәр иде, - диде Гүзәл Димитриева.

"Тантаналы төстә паспорт алу, әлбәттә, зур горурлык. Мин кулымда документ булуга бик сөенәм", - ди паспорт алган Эльвина Абзалова .

фото: Алсу Сәләхетдинова/ "Хезмәт даны", Фәнил мәрсетдинов