Бармы дустың? (шигырь)

Бармы дустың, салкын җилләр иссә,

Ышыкларлык, куеп иңнәрен?

Бер кабарлык булса үзенә дә

Чын күңелдән бүлер икмәген?

Дус беленә кайгы-сагышларда

Уртаклашып килсә яныңа.

Тик бер сүзе, бер гамәле җитә -

Җиңел булып китә җаныңа.

Рәхәт чакта дуслар күп булса да

Бүлешергә сыең-нигъмәтең.

Белгәннәре сирәк була шул ул

Дуслык-туганлыкның кыйммәтен.

Дусларым күп, диеп мактанмыймын,

Булганнары җилдә сыналган.

Алар өчен үзем дә җан атам,

Кирәк чакта читтә мин калмам.

Харис МОСТАФИН