Армиягә китә егетләр (шигырь)

Көз дә җитте, кошлар очып китте,

Китте алар җылы якларга.

Армиягә китә егетләр дә

Туган җирне, илне сакларга.

Тик бер генә елга китә егет,

Бик тиз үтеп китәр бу вакыт.

Ата-ана өчен ун ел кебек,

Алар көтәр улын сагынып.

Тыныч булсын берүк илебез,

Яхшы хезмәт телик аларга.

Ир-егетнең изге бурычы бу

Туган җирне, илне сакларга.

Татар егетләре һәрчак сынатмады,

Сез дә, шөкер, шуны акларсыз.

Яшь егетләр сынау, чыныгу алып

Чын егетләр булып кайтырсыз.

Туган җирнең саф һавасын сагынып,

Чишмәләрен искә алырсыз.

Төрле чагы булыр - авырлыгы...

"Яхшы", - диеп хатлар язарсыз.

Гармун тавышы, җырлар, елашулар...

Китә егет илен сакларга.

Хезмәт итеп, исән кайтсаң иде -

Шушы теләк егет балага.

Шәһидулла МОТЫЙГУЛЛИН, Каенсар