Кукмаралы кабат исерек килеш машина йөрткән өчен хөкем ителәчәк

Кукмара районы прокуратурасы Кукмарада яшәүче 25 яшьлек кешегә карата җинаять эше буенча гаепләү актын раслады. Ул Россия Федерациясе Җинаятьләр кодексының 264.1нче маддәсенең 1нче өлешендә каралган җинаять кылуда гаепләнә (исерек хәлдә машина йөрткән килеш җәзага тартылган булып, янәдән автомобиль руле артына утыру). 

Эш материалларыннан күренгәнчә, 2025 елның 5 июне кичендә Кукмара районының Зур Сәрдек авылында Мерседес-Бенз Е-Класс автомобиле руле артында исерек хәлдә булган ир-ат полиция хезмәткәрләре тарафыннан тоткарлана.

Документларын тикшергәндә җинаятьченең Россия Федерациясе Административ хокук бозулар турындагы кодексының 12.8нче маддәсенең 1нче өлеше буенча административ җаваплылыкка тартылганлыгы ачыклана. Ул вакытта хокук бозучы 30000 сум штрафка тартылган һәм 1 ел да 6 айга транспорт чарасы белән идарә итү хокукыннан мәхрүм ителгән була.

Ир-ат үз гаебен тулысынча таныды.

Җинаять эше судка җибәрелде.

Фото: «Татар-информ» МА