Төркәш авылында оештырылган кичке уен яшьлеккә алып кайтты

Авылдашлар, кайткан кунаклар бәйрәмгә җыелды. Тирә-якка дәртле, моңлы гармун тавышы таралды. Халкыбызның гореф-гадәтләрен, йолаларын искә төшереп, төрле уеннар: "Биш парлы", "Йөзек салыш", "Капкалы", "Назалы" һәм башкалар уйналды. Дәртле җыр-биюләр, шигырьләр, уен-көлке - барысы да булды. Авыл клубы мөдире Нәфыйк Зиннәтов ярдәме белән бу көнне яшьлегебезгә кайтып килгәндәй булдык. Һаман да шундый ук икән бит чордашларым - шук Фәрит тә, тыйнак Исмәгыйль, Суфия да.
Яшәргә дәрт өсти торган мондый мизгелләр тормышта ешрак кабатлансын иде. Киләчәк буын да әлеге чаралар аша гореф-гадәтләрне, йолаларны белеп, өйрәнеп үсә бит.
Яшьлеккә бит кайтып була икән,
Кабатланмый торган мизгелгә.
Тик аз гына хыял, дәрт-моң кирәк
Йөзәр өчен бәхет күгендә.
Рауза ХУҖИЕВА, Нырты авылы

фото: http://yandex.ru/clck/jsredir?from=yandex.ru%3Bimages%2Fsearch%3Bimages%3B%3B&text=&etext=777.R8qmjUUzy1iHviRleqm_cPRX-