Кайчан кимер бу эсселек?

Көн дә зарланып, бер-беребезгә бирелә торган сорауга әйләнде бу. Хәлсезлек, шабыр тиргә батып йөрү, кан басымының сикергәләве, йөрәкнең шаяруы, йокысызлык, тынчу һава - барысы да туйдырды. Аның каравы, быел купальник сатучы сәүдәгәрләргә уңыш аеруча елмайды, ди бер эшмәкәр. Ә инде интектергән соравыбызга бары тик синоптиклар гына җавап бирә ала. Интернет челтәренә урнаштырылган мәгълүматларга караганда, эсселек августның егермесенә кадәр дәвам итәчәк икән. Иртәгә яшенле яңгыр көтелә, җомга һәм шимбә көннәрендә болытлы һава сакланачак. Димәк, бу көннәрдә эсселекне җиңелрәк кичерербез дигән өмет бар.