«Иделем акчарлагы»: «Кукмара авазы» радиосының алып баручысы Алсу Гаязетдинова — жиңүчеләр исемлегендә

Казан шәһәрендә 25нче тапкыр «Иделем акчарлагы» яшь язучылар бәйгесе үткәрелде. Юбилей елында бәйгегә поэзия, проза һәм драматургия номинацияләренә 78 катнашучыдан 342 әдәби әсәр кабул ителгән. Катнашучылар — Татарстан, Башкортостан, Удмуртия, Чувашия Республикаларыннан, Кемерово, Самара, Төмән, Ульян, Чиләбе өлкәләреннән, Ямал-Ненец автономияле округыннан, Пермь һәм Приморье крайларыннан.

5-7 декабрь көннәрендә бәйгенең өченче этабы — иҗади мәктәп узды. «Идел» яшьләр үзәгендә жюри тарафыннан эшләре уңай бәяләнгән 30 каләм иясе өчен иҗади очрашулар һәм остаханәләр оештырылды.

7 декабрь көнне Габдулла Тукай әдәби музеенда җиңүчеләрне бүләкләү тантанасы үтте. Чарада Татарстан Республикасы яшьләр эшләре министры Азат Кадыйров һәм бәйгенең жюри әгъзалары — Ленар Шәех, Рифат Сәлах, Гөлүсә Закирова, Әлфәт Закирҗанов, Галимҗан Гыйльмановлар катнашты.

Бәйгедә хезмәттәшебез, «Кукмара авазы» радиосының алып баручысы Алсу Гаязетдинова «Поэзия» номинациясендә I урынга лаек булды.

Фото: Алсу Гаязетдинованың шәхси архивыннан