Кукмара үзәгендә төзекләндерү эшләре дәвам итә

Кукмара шәһәренең үзәк урамнарында «Тормыш өчен инфраструктура» илкүләм проекты кысаларында капиталь төзекләндерү эшләре дәвам итә. Бүгенге көндә биредә яңа брусчатка җәю өчен нигез әзерләү һәм юл кырыена борт ташлары урнаштыру эшләре бара.

Әлеге проект шәһәрнең юл-транспорт һәм җәмәгать киңлекләре инфраструктурасын яңартуга юнәлдерелгән. Программа нигезендә юл өслеген тулысынча яңарту, уңайлы җәяүлеләр зоналары булдыру, заманча урам яктырту системаларын урнаштыру, җәмәгать урыннарын төзекләндерү һәм территорияләрне яшелләндерү күздә тотыла.

Төзекләндерү эшләре вакытында шәһәр халкы өчен вакытлыча уңайсызлыклар килеп чыгарга мөмкин. Шул уңайдан район җитәкчелеге һәм подрядчы оешмалар халыкның аңлавына өмет итә. Башкарылучы эшләрнең төп максаты — шәһәр мохитенең сыйфатын күтәрү, Кукмараны яшәү өчен тагын да уңайлырак һәм матуррак итү.

Яңарту эшләре тәмамланганнан соң, шәһәр халкы һәм кунаклар заманча таләпләргә җавап биргән төзек урамнарны һәм яңартылган җәмәгать киңлекләрен бәяли алачак.

Фото: Ризилә Корбанова/ «Кукмор-информ»