Кукмара районында «Каршы як полоса» операциясе старт алды

21 ноябрьдән 30 ноябрьгә кадәр республикада, шул исәптән Кукмара районында да «Каршы як полоса» дигән профилактик чаралар уза. Аның төп максаты — юл-транспорт фаҗигаләрен профилактикалау, транспортны юлның каршы як полосасына чыгып узып киткән вакытта кагыйдә бозуларны кисәтү һәм булдырмау. 

«Быелның 10 аенда республикада юлның каршы як полосасына чыгу нәтиҗәсендә 218 юл-транспорт һәлакәте теркәлде, аларда 17 кешенең гомере өзелде, 345е төрле тән җәрәхәтләре алды», — дип сөйләде Кукмара районының ЮХИДИ бүлеге җитәкчесе Фирдүс Фәхретдинов. 

ЮХИДИ бүлеге җитәкчесенең сүзләренә караганда, тиешле кагыйдәләрне үтәмәүчеләргә 5 мең сум штраф яисә дүрт айдан алты айга кадәр йөртү таныклыгынннан мәхрүм ителү яный. Икенче тапкыр кагыйдәне бозучылар 1 ел транспорт руле артына утыра алмаячак. 

Юлларда һәркемнең игътибарлы һәм сак булуы сорала.

Фото: Эльвира Иванова/ «Хезмәт даны»