Намуслы хезмәт — мәңгелек үрнәк: Чигайка авылында Сергей Захаровны искә алдылар

Истәлекләр

Күптән түгел Чигайка авылында Социалистик Хезмәт Герое Сергей Александрович Захаров истәлегенә мемориаль такта ачу тантанасы узды. Аны ачу хөрмәте бертуган сеңлесе Мария Ишпаевага бирелде.

Мария Ишпаева абыйсы Сергейның балачак һәм яшьлек еллары турындагы истәлекләре белән уртаклашты. Ул аларның Чигайка авылында күпбалалы гаиләдә туып-үскәннәрен, кечкенәдән үк әти-әниләренә хуҗалык эшләрендә булышуларын, абыйсы белән бергә Уяль (хәзерге Поч. Кучук) сигезьеллык мәктәбендә белем алуларын сөйләде.

Мәктәпне тәмамлагач, балалар хат ташучы булып эшләгәннәр, чиратлашып авылларга газета-журналлар, хатлар таратканнар. Икәүләшеп, әтиләре җитәкчелегендә йорт та салганнар. Җәйге каникул вакытларында Сергей Захаров комбайнчы ярдәмчесе булып эшләгән. Геройның әти-әнисе дә авылда хөрмәтле кешеләр булган: әнисе — алдынгы тракторчы, ә әтисе — Бөек Ватан сугышы ветераны. Сергей яшьтән үк хезмәт сөючәнлеге һәм җаваплылыгы белән аерылып торган.

Сергей Александрович Чиләбе шәһәрендәге «Серго Орджоникидзе исемендәге завод» җитештерү берләшмәсендә токарь булып эшләгән. Аның катнашында мөһим дәүләт заказы кыска вакытлар эчендә үтәлгән. Бу исә совет гаскәрләрен заманча корал белән тәэмин итүгә зур өлеш керткән.

Бүләкләр

СССР Югары Советы Президиумының 1985 елның 13 маендагы (ябык) Указы белән Сергей Александрович Захаровка Социалистик Хезмәт Герое исеме бирелгән, Ленин ордены һәм «Урак һәм Чүкеч» алтын медале тапшырыла.

Сергей Александрович 1977 елда Хезмәт Кызыл Байрагы ордены, 1974 елда «Хезмәттәге батырлык өчен» медале белән бүләкләнгән. Ул — Егор Агарков исемендәге Совет профсоюзларының Бөтенсоюз премиясе лауреаты (1982 ел). Шулай ук аңа «СССР машина төзелеше министрлыгының сыйфат отличнигы», «Һөнәре буенча иң яхшы эшче» исемнәре бирелгән.

Сергей Захаров 2025 елда вафат булган. Чиләбе шәһәрендә җирләнгән.

Чараның мөһим өлеше — анда катнашучыларның барысына да геройга карата хөрмәтләрен белдерү мөмкинлеге тудыру булды. Бу тантана илебез өчен зур хезмәт куйган кешеләрне онытмауның никадәр мөһим булуын күрсәтә. Мемориаль такта кую герой турындагы истәлекне сакларга, аның хезмәтләре бәяләнүен һәм онытылмавын күрсәтергә ярдәм итә. Тантаналы митингта КПРФның җирле бүлекчәсенең беренче секретаре Владимир Иванов, Чигайка авылы халкы, каһарманның туганнары, Поч. Кучук урта мәктәбе укучылары катнашты.

Сергей Александрович Захаровның якты образы киләчәк буыннар хәтерендә хезмәт сөючәнлек һәм намуслылык үрнәге булып калачак. Аның исеме зур казанышлар һәм игелекле эшләр белән бәйле. Ул яшьләрне дә үз үрнәге белән рухландыра. Мемориаль такта һәм истәлекле чаралар аның турындагы хәтерне сакларга, яшь буынга җиткерергә ярдәм итә.

Владимир ИВАНОВ, укытучы-ветеран, Иске Кенә