Кукмарада юл хәрәкәте иминлеге буенча комиссиянең чираттагы утырышы узды

Кукмарада юл хәрәкәте иминлеген тәэмин итү буенча комиссия утырышы узды. Утырышны Башкарма комитет җитәкчесе Азат Гарифуллин алып барды.

Көн тәртибенә юллардагы иминлекне тәэмин итүгә кагылышлы бик күп мөһим һәм әһәмиятле мәсьәләләр куелган иде.
Кукмара районында авария хәлен анализлау һәм юл хәрәкәте иминлеген тәэмин итү буенча район ЮХИДИ бүлеге начальнигы Фирдүс Фәхретдинов чыгыш ясады.

«Бу елның 5 аенда Кукмара районы территориясендә 7 юл-транспорт һәлакәте теркәлде, аларда 9 кеше төрле тән җәрәхәтләре алды. Узган елның шул ук чоры белән чагыштырсак, һәлакәтләр саны 1гә кимрәк. Юл-транспорт һәлакәтләренең төп сәбәбе – исерек килеш транспорт белән идарә итү, юлның каршы як полосасына чыгу, җәүялеләрнең кагыйдәләрне сакламавы. Транспорт чарасы белән исерек хәлдә идарә иткән һәм медицина тикшерүе узудан баш тарткан өчен 64 шофер тоткарланды», - дип билгеләп үтте ул.

Шулай ук балалар травматизмын кисәтү, ясалма тигезсезлекләр кую, районда август аенда узачак юл хәрәкәте иминлеге буенча киңәйтелгән утырышка әзерлек һәм башка мәсьәләләр кузгатылды.

Фото: Алсу Сәләхетдинова/ «Хезмәт даны»