Кукмарада Коръән укучылар бәйгесе үтте

Кукмара районы мөхтәсибәтенең «Туеш» мәхәлләсе бүләкләренә «Мин Коръәнне яратам!» дип исемләнгән Коръән укучылар бәйгесе үткәрелде. Бу хакта Туеш мәчете имамы Айрат хәзрәт Шәфигуллин хәбәр итте.

Анда Кукмара районы мәчетләренең Коръән ятлау түгәрәкләренә йөрүче, шулай ук Казан, Әлмәт, Мамадыш, Теләче, Балтач, Сабадан килгән 4 яшьтән 15 яшькә кадәрге малайлар катнашты.

Бәйге 6 төркемдә барды: Нәбә-Нәс төркеме — 8-15 яшь, 12-15 яшь, Духа-Нәс төркеме — 8-11 яшь, 12-15 яшь, Фил-Нәс төркеме — 8-11 яшь, Башлангыч — 4-7 яшь. 

Һәрбер катнашучыга «тәмле» күчтәнәчләр, ә төркемнәрдә җиңүчеләргә исә диплом, медаль һәм кыйммәтле бүләкләр тапшырылды. 

Балаларны Коръән хафизлардан гына торган дәрәҗәле хөкемдарлар бәяләде. Барлык катнашучылардан, оештыручылардан, ярдәм итүчеләрдән, хезмәт күрсәтүчеләрдән Аллаһы Тәгалә разый булсын.