Хезмәт даны
  • Рус Тат
  • Кукмара районында яшәүче хатын-кызлар идеаль ир-егетнең нинди булуы турында сөйләде

    Райондашларыбыз ир-егетләренә нинди бүләк бирергә ярата? Гүзәл затлар ирләрнең тышкы кыяфәтләре турында ни уйлыйлар икән? Сораштыруыбыз шул хакта.

    Хатын-кызларның күбесе Ватанны саклаучылар көненә ир-егетләренә бүләк сайлап аптырамый: юка оекбаш, шампунь, акча янчыгы кебек кирәк-яраклар ала да куя. Ә менә райондашларыбыз аларга нинди бүләк бирергә ярата соң? Гүзәл затлар ирләрнең тышкы кыяфәтләре турында ни уйлыйлар икән? Идеаль иргә нинди сыйфатлар хас? Сораштыруыбыз шул хакта.

    Гөлшат РӘХИМҖАНОВА, 27 яшь, Купка:

    - Ир-ат кыяфәтендә иң беренче нәрсә җәлеп итә?

    - Аның ничек киенүе, «стрижкасы», исе.

    - Ни өчен алар мускулларын «үстерергә» омтыла?

    - Хатын-кызның игътибарын җәлеп итәр өчен.

    - 23 февральгә егетләргә нинди бүләк ясау уңышлы?

    - Аларның нәрсә белән кызыксынуы, шөгыльләнүенә карап бүләк сайларга кирәк. Ул яктан иремә бүләк алуы җайлы. Чөнки Рөстәм спортка гашыйк. Коньки, кәшәкә, форма, туп, сумка – бөтенесе гел кирәкле әйберләр. 

    - Ир-егетнең машина йөртү таныклыгы булуы мәҗбүриме? Ни өчен?

    - Әлбәттә, мәҗбүри. Хәзер ансыз тормышны күз алдына да китереп булмый. Машинада йөргән ир-ат хатын-кызларны күбрәк җәлеп итә.

    Лилия ГАРИПОВА, 32 яшь, Кукмара:

    - Егет тормыш иптәшен нинди сыйфатына карап сайлый?

    - Күбесенчә егетләр тормыш иптәшләрен әниләренә охшатып сайлыйлар: кайгыртучан, гаилә өчен янып торучы.

    - Ирләрнең акча янчыгында кимендә ничә сум акчасы булырга тиеш?

    - Хәзерге заманда акча күбрәк банк картасында саклана. Ирләрнең акча янчыгында ким дигәндә 1-2 мең сум акчасы булырга тиеш дип уйлыйм.

    - Ир-ат аеруча нинди темага сөйләшергә ярата?

    - Минемчә, ир-атларның иң яраткан темасы ул – машина.

    - Хатыннар нинди ирләрдән курка?

    Реклама

    - Тәкәббер, саран, начар гадәтләре булган, үз көчләренә үзләре ышанмаучы ир кешеләрдән.

    Эльвира ФӘТТАХОВА, 47 яшь, Салтык-Ерыклы:

    - Ир-ат нинди хатын-кыз эшен яратып башкара?

    - Тузан суырта, ашарга пешерә.

    - Көчле яки матур ир-атмы? Ни өчен?

    - Көчле, чөнки ул гаиләсен сакларга һәм якларга тиеш.

    - Алар аеруча нинди бүләк алырга ярата?

    - Миңа калса, теләсә нинди бүләккә дә риза. Бары тик чын күңелдән һәм яратып бүләк ителгән булсын.

    - Идеаль, чын ир нинди сыйфатларга ия булырга тиеш, аның портретын ничек күзаллыйсыз?

    - Ул уртача буйлы, тәртипле, эчкерсез, кыю йөрәкле, хатынын һәм балаларын ярата.

    Әлфия ГАЗИЗУЛЛИНА, 53 яшь, Ташлы Елга:

    - Ир заты акыллыракмы яки хатын-кызмы? Ни өчен?

    - Ир-ат дип уйлыйм. Гаилә учагын кабызучы – ир-ат, ә шул учакны сүндермичә саклаучы – хатын-кыз.

    - Нинди эш бары тик ир-атныкы гына?

    - Ир-атның бурычы - өй салу, агач утырту, малай үстерү, диләр. Моннан тыш, гаиләне тәэмин итү, туендыру да аның төп эше дип саныйм.

    - Аларны нәрсә бәхетле итә?

    - Бер-береңне аңлап яшәү, гаиләдә тыныч мохит тудыру бәхеткә илтә.

    - Армиягә бармыйча калган егеткә карашыгыз нинди?

    - Ир-ат үзенә бирелгән вазыйфаны үтәргә тиеш дип саныйм. Чөнки ул армиядә авырлыкларга түзеп, чыныгып кайта. Армиягә барган егеткә кызлар арасында да хөрмәт зур.
     

    «Кукмор Татарстан» Telegram-каналга язылыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: