Иганәчеләр ярдәме белән ял бүлмәсе ремонтладык

“Наз” социаль ярдәм күрсәтү үзәгендә районыбызның өлкәннәре һәм инвалидлар тернәкләнү узалар. Биредә алар медицина, социаль, психологик, хокукый һәм башка ярдәм алалар. Без, үзәк хезмәткәрләре исә, аларны кайгыртырга, аңларга, сәламәтлекләре яхшырсын, кәефләре күтәрелсен өчен, матурлык һәм уңайлыклар тудырырга тырышабыз. Әлеге уңайдан быел үзәкнең ял бүлмәсендә ремонт эшләре башкарылды. Безгә Артур Мостафин буяу белән ярдәм итте, ә Фәнил Хөрәмшин линолеум бирде. Үзебезнең хатын-кызлар коллективы белән эшкә тотындык. Көчебездән килмәгән эшләрдә Рафаил Шәриповка таяндык. Һәм менә бердәм хезмәтебезнең нәтиҗәсе – чиста, җылы, уңайлы ял бүлмәсе әзер.

Гөлүсә ӘХӘТОВА, “Наз” үзәге директоры